Российская Православная Автономная Церковь, Суздальская Епархия, город Суздаль

Воскресенье, 17 Февраля 2008

Доклад Архиерейскому Собору РПАЦ «О новой редакции Чинопоследования в Неделю Торжества Православия»

Доклад Архиерейскому Собору Архиепископа Борисовского и Отрадненского Феодора
Ваши Преосвященства, предлагаю Вашему вниманию разработанный проект новой редакции текста Синодика, возглашаемого в церкви в Чине Торжества Православия. В его основу положен сокращенный текст Синодика, издревле печатающегося в греческих и славянских Триодях (до распоряжения Императрицы Екатерины II об отмене употребления древнего текста и составления митр. Санкт-Петербургским Григорием вместо Синодика краткого Чина благодарственного молебна):
«Ежегодно повторяемое благодарение к Богу, в той день егда паки прияхом Божию церковь, с объявлением догматов благочестия и развращением злобных нечестий.

Последуя пророческим глаголом, повинуясь апостольским учениям и согласуясь с Евангелием, обновления день празднуем. Исайя глаголет: обновляются островы к Богу, сиречь обновляются церкви народов. Ибо церкви есть не просто здания храмов и украшения их, но иже в них суть благочестивые христиане, идеже они божественными пениями и славословиями служат. Апостол же то же самое уча, в обновлении живота шествовати повелевает и яже о Христе нова тварь, обновляйтеся. А Господни словеса пророчествуют нам: быша, рече, обновления во Иерусалимех и зима бе, сиречь зима умная, когда народ иудейский на Спасителя воздвизаше бури и угрожая убийством, якоже зима, оскорбляющая телесная чувства пременением воздуха во хлад. Бысть и у нас зима, не обычная, но воистину великия злобы проливая суровство. Но процвете нам даров Божиих первовременная весна, в нейже и благодарственную жертву от жатв собрахомся Богу сотворити, или псаломски рещи, жатву и весну Ты создал еси я, помяни я. Ибо врагов, поносивших Господа и возвысившихся нечестием своим и обесчестивших святое поклонение святых икон, разруши иже чюдес Бог и шатание отступления разсея. И не презре гласа вопиющих к нему: помяни, Господи, поношение раб Твоих, еже удержа в недрах моих многих язык, еже поносиша врази Твои, Господи, еже поносиша искупление Христа Твоего; ибо искупление Христово есть — смертью Его искупленные и верующие Ему чрез возвещение слова и иконное изображение. Яко великое таинство спасения, Господом соделанное крестными страстьми и чудесами, нами, избавленными, познавается чрез возвещение слова и иконное изображение. А от Самого Христа чрез слово Его и образ страсти Его подражати научишася апостолы, от тех же мученики, а от мучеников — исповедники и безмолвники.

Сие поношение, имже поносиша врази Господни искупление Христа Его, воспомянув Бог наш, от людей Своих благоутробно умоляем, и яко чадолюбивая мать на мольбы их призирая, но не токмо их, но и на мольбы апостолов и всех святых, которых вкупе с Ним уничижиша и избиша в иконах (да якоже спострадаша телом, сице убо и на честных иконах сопричастны будут Его досадам), содела послежде [то], еже постановляется днесь, и содела уже второе, егда сконча первое. Первее убо, после многих лет укоризны и безчестия святых икон, возвратися к нам благочестие, ныне же, еже есть второе, почти по тридесяти летех озлобления соделал Господь нам, недостойным, избавление от злых и от озлобляющих, и утвердил паки благочестия проповедание и иконное поклонение, и устроил есть нам праздник всего спасительного. Ныне бо зрим на иконах крест Владычней за нас страсти, гроб, ад умерщвляемый и пленяемый, страдания мучеников, венцы, и все самое спасение, еже первый наш Законодатель страданий посреде земли содела. Таковое днесь торжество празднуем, и в веселии и радости, в псалмех и песнех взываем: Кто Бог велий, яко Бог наш, Ты еси Бог наш творяй чудеса един.

Досадителей бо Твоей славы и посмеявшихся Твоему образу посрамил еси, и дерзких в страх и бегство обратил еси. Сего ради благодарение Богу воздавая и как бы от трудов и скорбей шествия по пустыням покоя в умном Иерусалиме достигше, сочли мы праведным и должным, по образу законному, паче же повинуясь божественным повелением, начертати в сердцах братий, якоже на столпе некоем, из великих камней составленном и к приему писания устроенном, благословения, приличные хранящим закон, и клятвы ихже на ся возлагают беззаконнующии. Сего ради глаголем сице:

Яко пророци видеша, яко апостоли научиша, якоже Церковь прияла, якоже учители богословиша, якоже вселенная мудрствова, якоже благодать просия, якоже истина показася, якоже лжа отгнана бысть, якоже умудри премудрость, якоже Христос настави: тако мудрствуем, тако глаголем, тако проповедуем Христа истиннаго Бога нашегои Того святых чтем словесами, в писаниих, в помышлениих, в жертвах, в храмех, в иконах;Тому убо яко Богу и Владыце покланяющеся и чтуще, тех же ради общаго Владыки, яко Того ближних угодников, чтуще и относительное поклонение сим воздающе.

Сия Вера апостольская, сия Вера отеческая, сия Вера православная, сия Вера вселенную утверди!

Сия яко благословения отеческая к нам, сыновом, ревнующим тех благочестию, преходят, такожде и анафемы на досадителей отцов и презирателей владычних заповедей падают. Посему сообща вси, яко благочестия полнота, тем анафему, юже сами на ся возложиша, возлагаем тако:

Вся, яже на святыя патриархи Германа, Тарасия, Никифора и Мефодия, Игнатия, Фотия, Стефана, Антония и Николая писанная или реченная — анафема 3.

Вся, яже паче церковнаго предания и учения и установления святых и приснопамятных отец новоположенная и развращенная или по сем содеянная — анафема 3.

Приемлющим пришествие во плоти Бога Слова, зрети же на тое на иконе не хотящим, и сего ради являющих себя приемлющими глаголы, делом же спасения отрицающимися — анафема 3.

Пребывающим во иконоборческой ереси, паче же в христоборном отступлении и не хотящим ни моисейским законом, ни апостольским учением, ниже святых отец учениями от прелести своея обратитися ко спасению своему, но единожды себя самех к иудеям и язычникам приложжшим, ибо яко они на Первообраз хулят, так и сии чрез образ Его на Самого Изображаемаго хулу возносят; нераскаянно прелестию таковою одержимым яко члены согнившия и общаго телесе церковнаго отсекающии себе — анафема 3.

Разумеющим речения Божественного писания противу идолов яко противу честных икон Христа Бога нашего и святых Его — анафема 3.

Тем, иже разумно имут общение с теми, иже хулят и отвергают святые иконы — анафема 3.

Глаголющим христиан иконам поклоняющихся яко богам (сиречь протестантам, баптистам, адвентистам, пятидесятникам, лжеименным «свидетелям Господа», евангелистам, харизматам и иным) — анафема 3.

Аще кто не покланяется Господу нашему Иисусу Христу в иконе описанному по человечеству — анафема 3.

Злочестиво вводящим в православную и кафолическую Церковь учения еллинская о душах человеческих, о небеси и земле и иных творениих — анафема 3.

Предпочитающим безумную внешних философов глаголемую премудрость, и переселения душ человеческих в ину тварь приемлющим, или яко подобно безсловесным животным сии погибают, и сего ради Воскресение и Суд и конечное воздаяние отметающим — анафема 3.

Суетная учения еллинских философов приемлющим и не ради научения токмо им научающимся, но и мнением их яко истинным верующим — анафема 3.

Глаголющим, яко в конечное и общее Воскресение со иными телесы человецы востанут и осудятся, а не с нимиже в настоящей жизни скончашася, аки сим истлевшим и погибшим— анафема 3.

Приемлющим суетные глаголы, яко предбытие есть душ и яко конец есть мучению, или возстановление паки твари и вещей человеческих, и таковыми словесы Царство небесное совершенно упраздняющим, и не верующим, яко Царствие Христово вечное есть и неразрушимое, такожде и мучения во аде бесконечные— анафема 3.

Арию, первому на Бога хулу воздвигшему и ересиарху — анафема 3.

Павлу Самосатскому и Феодотиону, безумному Несторию, зломудрому Евтиху и Савеллию — анафема 3.

Не покланяющимся кресту Господа и Бога и Спаса нашего Иисуса Христа яко спасению и славе всего мiра, вконец разрушившему и погубившему хитрости и оружия врага и искупившему творение от идолов, но глаголющим его токмо тиранническое оружие быти — анафема 3.

Верующим, яко на всяк день приносимая священниками жертва токмо Богу Отцу приносится, а не всей Святей Троице, яко противовещателем священным и божественным отцем Василию же и Златоусту и прочим богоносным отцем — анафема 3.

Мудрствующим, яко в воплощении Бога Слова тело Господне бысть единосущно Богу и мнящим, яко обожение воспринятаго Христом человечества бысть пременение человеческаго естества в Божество — анафема 3.

Уничижающым святые Вселенские Соборы и презирающым священные и божественные каноны Святых Отцев наших, ихже Церковь Божия приемлет и ведется ими к истинному богопочтению — анафема 3.

Исповедующим свет Преображения Господня тварным — анафема 3.

Гонителем Христовы Церкве, нечестивым отступником, подъявшим руки на священнослужителей Божиих, поправшим святыни, разрушившим храмы Божии, истязующим братию нашу и осквернившим отечество наше, и преемствующим им яко властителем — анафема 3.

Теософом еретиком, дерзающим глаголати и пребезумне учити, яко Господь наш Иисус Христос не единожды на землю сниде и воплотися, но множицею вополощащеся, такожде и отрицающым, яко истинная Премудрость Отчая несть Сын Его Единородный и вопреки Божественному Писанию и учению святых Отец ищущим иныя премудрости — анафема 3.

Масоном, оккультистом, спиритом, чародеем и всем, иже не Единому Богу веруют, но бесов почитают, и не Богу смиренно жизнь свою предают, но чародейным бесов призыванием грядущее ведети тщатся — анафема 3.

Безумно утверждающим обновленческую ересь сергианства, учащым, яко земное бытие Церкви Божией может основано быти на отрицании истины Христовой, и утверждающым, яко служение богоборческим властем и верность их безбожным повелением, попирающе священныя каноны, святоотеческое предание и божественныя догматы и разрушающе все христианство, спасает Церковь Христову; и почитающым антихриста и слуг его и предтеч его и всех присных его яко законную власть от Бога; и богохульствующым противу новых Исповедников и Мучеников российских — анафема.

Вселукавому Сергию Нижегородскому, безбожным властем предавшемуся и от них главой нечестивого сборища поставленному и ради личнаго благополучия венца мученическаго отрекшемуся, и рекшаго себя быти патриарха Московскаго и Всероссийскаго, и всем того последователем — анафема.

Нападающым на Церковь Христову и учащым, яко она разделися на ветви, яже разнятся своим учением и жизнию, и утверждающым Церковь не сущу видимо быти, но от ветвей, расколов и иноверий соединитися имать во едино тело; и тем, иже не различают истиннаго священства и таинств Церкви от еретических, но учат, яко крещение и евхаристия еретиков довлеют для спасения— анафема.

Экуменическия ереси начальником и ересиархом новым, Мелетию Константинопольскому, Хризостому Афинскому, Никодиму Ленинградскому, Афинагору и Димитрию Константинопольским и всем единомудренным с сими, открытою главою исповедующым ересь экуменизма вкупе с прочими ересьми Лютора и Кальвина и дерзко возстающым на благочестие, оклеветующым и похуляющым святых Отец наших и святыя Соборы, и тако и каноном церковным насмеявшимся — анафема.

Исповедающим словом, сердцем и умом, в рукописании же и на иконах плотское Бога Слова пришествие — вечная память 3.

Ведущим, яко в одной и той же ипостаси Христове пребывают два различаемых естества, в одном Христе созданное и несозданное, видимое и невидимое, страстное и безстрастное, описанное и неописанное, и приписывающим божественному существу несозданное, невидимое, безстрастное и неописанное, человеческому же естеству — созданное, видимое, страстное и описанное, и исповедующим сие словом и в иконах — вечная память 3.

Освящающим словом уста и слух, и проповедающим, яко и честными иконами такожде освящаются очи зрящих, и ум воздвигается к боговидению, якоже и божественными храмы, и священными сосуды, и иными вещьми — вечная память 3.

Ведущим, яко жезл и скрижали, ковчег и светильник и трапеза и кадильница предызображаше Пресвятую Деву Марию Богородицу, но сии лишь образы Ея быша, Сама же Она не бысть сия, но бысть Дева и пребывает по Богорождестве Дева; и сего ради пишущим Ю на иконах паче яко Отроковицу, или в образех ветхаго завета — вечная память 3.

Ведущим, яко Сам Бог образами и знаменьми являл Себе пророком в видениих, и верующим, якоже пророческий лик видев научи, и изложенное чрез апостолов и отцов писанное и неписанное предание держащим и сего ради изображающим святая и чтущим — вечная память 3.

Разумеющим Моисея глаголющаго: внемлите себе, яко в день, воньже глагола Господь Бог в Хориве на горе, глас глаголов вы услышасте, подобия же не видесте; и ведущим отвещевати праве: аще видехом что, поистине же видехом, якоже громов сын нас научи, еже бе исперва еже слышахом, еже узрехом, еже видехом очима нашима и руки наша осязаша о словеси животне, и та свидетельствуем, и паки якоже и инии Слова ученицы: и ядохом с Ним и пихом не прежде страсти токмо, но и по страсти и воскресении; и тако разделяти от Бога данные предписание Закона и благодати учение — в том невидимое, в сей же видимое и осязаемое, и сего ради виденная же и осязанная иконописующим и покланяющимся — вечная память 3.

Посему проповедников благочестия братски и отцежелательне в славу и честь благочестия, о нем же подвизашася, воспроповедуем и глаголем: Герману, Тарасию, Никифору и Мефодию яко воистину святителем Божиим и Православия поборником и учителем — вечная память 3.

Игнатию, Фотию, Стефану, Антонию и Николаю, святейшим и православным патриархом — вечная память 3.

Исповедующим, яко Тело Господне причастися божественного достоинства и величества и бысть покланяемо единем поклонением в восприявшем оное Боге Слове, и единочестно, единославно, животворно, равнославно Богу Отцу и единопрестольно Всесвятому Духу — вечная память 3.

Приемлющым и неизменно хранящим Символ веры — вечная память 3.

Исповедающим Бога триипостаснаго, всесильнаго, несозданнаго не токмо по существу и ипостасям, но и по действу, и глаголющим, яко Божественное действо происходит от Божественнаго существа, происходит же нераздельно — вечная память 3.

Евфимию, Феофилу и Емилиану приснопамятным исповедником и архиепископом — вечная память 3.

Феофилакту, Петру, Михаилу, Иосифу блаженным митрополитом — вечная память 3.

Иоанну, Николаю и Георгию пребогатым исповедником и архиепископом и всем единомудрствовавшим им епископом — вечная память 3.

Феодору, всепреподобному игумену Студийскому, Исаакию чудотворцу и Иоанникию пророку — вечная память 3.

Симеону преподобному Столпнику, Илариону преподобному архимандриту и игумену Далматскому, Феофану преподобному игумену Великого Поля — вечная память 3.

Исповедавшым, яко не человецы спасают Церковь, и ничтоже пользует согласие со враги ея, но Церковь спасает человеков силою Христа Бога нашего, и тако противу поработителей Церкви Божией подвизавшымся — вечная память.

Тихону, святейшему патриарху Московскому и всея России исповеднику, славным мучеником и исповедником Петру Крутицкому, Кириллу Казанскому, Агафангелу Ярославскому, Иосифу Петроградскому, Виктору Глазовскому, Димитрию Гдовскому, Алексию Воронежскому, Нектарию Яранскому, Серафиму Угличскому и всем Новым Исповедником и Мучеником Церкве Российския, — вечная память.

Исповедующым по благочестивому мудрованию святых Отцев и Соборов, яко Церковь Христова едина чистая голубица, никогдаже разделися, но присно цела пребывает и неколебима, аще и мнози еретицы и раскольницы нападаху на ню, обаче со срамом от сея отпадоша, поколебати же никакоже возмогоша, и верующым во Едину, Святую, Соборную и Апостольскую Церковь, в ней же единей спасение обрести мощно есть, и исповедующым, яко вне Церкви Православныя несть спасения никомуждо, — вечная память.

Святейшым исповедником православия, противу новшествующих подвизавшымся, Хризостому епископу Флоринскому, Гликерию митрополиту Румынскому, Филарету митрополиту Нью-Йоркскому, новому исповеднику, противу ереси икуменизма добре подвизавшемуся, — вечная память.

Григорию Вашингтонскому, Леонтию Чилийскому, Аверкию Джорданвилльскому, Нектарию Сеатлийскому, Виталию Джерджиситскому и прочим иерархом Русския Зарубежныя Церкве, утверждавшим Православие — вечная память 3.

Всем же о Православии подвизавшымся словесы, писании, учении, страдании и богоугодным житием, яко защитником и пособником онаго, Христова Церковь восклицает:

Православным царем греческим Святому благоверному и равноапостольному царю Константину и матери его Елене,— вечная память 3.

Благоверному и равноапостольному великому князю Владимiру, благоверней велицей княгине Ользе, Ярославу, Георгию, Андрею Боголюбскому и прочим благоверным царем и великим князем, царицам и великим княгиням и всем от рода царей и великих князей российских преставльшимся — вечная память 3.

Герману, Тарасию, Никифору и Мефодию, приснопоминаемым патриархом Константинопольским, Александрийским, Антиохийским, Иерусалимским, о Православии подвизавшимся — вечная память 3.

Иову, Гермогену, Филарету, Иосифу, Иоакиму, Адриану, Тихону патриархом Всероссийским — вечная память 3.

Преосвященным митрополитам Антонию и Анастасию и прочим архиепископом, епископом и всем православным христианам Русския Зарубежныя Церкви, во православии скончавшимся — вечная память 3.

Пострадавшим и убиенным за православную веру и отечество князем, боляром, христоименитому воинству и всем православным христианом в истинней вере и благочестии и в надежди воскресения скончавшимся — вечная память 3.

Святая Троица прослави сих. Сих же страданьми за благочестие до смерти, и подвиги их и ученьми научитися и утвердитися Бога молящи и подобниками божественнаго их жития явитися до конца молящеся, да сподобимся и мы щедротами и благодатию великаго и перваго архиерея Христа истиннаго Бога нашего, молящеся Преславней Владычице нашей Богородице и Приснодеве Марии и боговидным ангелам и всем святым. Аминь.

Православная Христова Церковь, торжественно воспоминающе подвизавшихся во благочестии и сие всем своим христоименитым чадом к подражанию представляюще, имать такожде долг восхваляти подвиги сих, иже ныне спасительною верою и добродетелию приуготовляюще себе к вечному блаженству, утверждают Православие.

Православному епископству гонимыя Церкве Российския — многая лета 3».

Подписаться на RSS-ленту новостей